Pablo X. Suárez

Fundación Ortega MuñozPoesía, S10

PABLO X. SUÁREZ

sAMARTÍN d'anes, 1981

BABEL

Yo yá taba equí
muncho enantes de tar equí
vini con cresta y una cabra en 1999
daquella l’aspersor yera un ríu y había pelos montes
madalenes
yo vini cola idea de pañales
y pastiar
yá que sintiéramos a Diego Ratón cuntar de tierres
nes cuales yera cielu’l suelu
nes cuales la propia cayida yera l’ascensión
nes cuales la xente yera güelo y nieto
al empar, nunca padre
o fíu
veníemos a levitar
en cuantes que gravitábemos
llegamos nel momentu esactu de la historia de Babel
nel qu’entá s’entendíen los pueblos a pesar de falar
llingües distintes
entós la torre yera una poza y comunicábemonos per aciu de fogueres
que prendíemos nes llombes
y cada foguera yera una lletra
y según ardía así falábemos
en Babel.


Remember

Quixera volver a los noventa y comprar un melón solo pa fumar
volver a los ochenta
volver al úteru
nun tar ni en proyectu
si yo yá fui’l mio biagüelu Varisto ciegu de sidra en 1952
fui Cristo, un neandertal
llevanté los castros cuantayá
y roblé con Roma la rendición
volé Babel y ellí cavé un pozu onde dexé escrito nun papel pequeñu
que’l negru ye un color y non l’ausencia d’ello
y la ballena un pexe y como tal vive
invento la democracia y la bombilla que nun funde
adáptome a los ciclos y soi
jipi nel solsticiu y quinqui d’equinociu
siempre igual
y siempre güei
pulgando la cebolla capa a capa
como buscando una piel propia.


ADOPTAR UN MASTÍN

Quién quier adoptar un mastín
yo quiero que m’adopte un mastín
él a mí
grande y serenu
que ya fui oveya tiempu
tonta y prieta, nos noventa
depués morrió güelita y una moza
que tenía de güeyos claros marchó a la China
y yá naide me llenda y siempre hai chigre
abiertu
y anque a pesar de la mio educación deprendí a frir
güevos ensin que ruempa la yema
a nun morrer de fame
como quien diz
voi pastiando
los praos d’otros ensin segar como si fueren míos
y llevo dientro la ganadería entera
pero siempre dispersa
y más perdida que Bizancio
cómo voi adoptar un mastín
que m’adopte él a mi
y me cuide.