CHECHU GARCÍA
MARAVÍES
Mirailes.
Les cúpules de Samarkanda
brillando al sol de mediudía.
La gran muralla china
devorando l ́horizonte.
Les pirámides d ́Exiptu,
los bisontes d ́Altamira,
el Partenón, l ́Alhambra, el Coliséu.
¿Maravíes dicís?
Son los restos
d ́un mosaicu arrasáu pola arena.
Débiles voces del mundu que les fixo.
Namás.
Teseles
na rara flor del tiempu.
ESQUELES
Punxeron dos esqueles
nel palu de la lluz.
Naide vino a quitales.
L ́agua
esborronó les lletres
tarazó los nomes
y abrasó ́l papel.
Cayeron embaxo.
Queden
les chinchetes
mordiendo la madera,
silencioses lápides
nel escuru corazón de la memoria.
Chinchetes.
Arrancáronles pa fin d ́añu.
Qué poco costó.
Valíen –dixeron- pa poner
los cartelos del baile.
Chinchetes.
Silencioses lápides.
Claváronles a martiellu
cola enraxonada fuerza de la mocedá.
Mancaben.
Mancaben metíes tan fondes.
Pero nin una llárima saltó del secu palu de la lluz.
PEQIEÑA MOSCA
Abaxo nel parque
los guahes xueguen.
Son allegres millonarios
marafundiando la so fortuna
a mano enllena.
El cielu ye azul
Qué fácil ye gastar cuando se tien.
Na ventana.
Un llocu runfir que m’atrae.
La desesperación d’una mosca
que choca y choca nel cristal.
Caos diminitu.
Qué más dará miralu.
Apara.
Esfriega les patuques,
peina xeométrica los güeyos
aparenta que nada se-y escapa.
Estrañu ritu.
Unos tímidos pasos
y torna alloquecida a la so carga.
Una mena de xusticia tresparente,
poco importa lo que faiga
l’esfuerzu que ponga.
Va fracasar
en cada asaltu.
Igual-y da,
nel so pequeñu cerebru nun cabe la derrota.
Quier trevesar los cristales.
Trevesalos.
Nel so agónicu enfotu
nunca va rendise.
Llucha con desesperación
una
y otra vuelta.
Y respígome al vela.
Tan ayena a nosotros y tan cercana.
Qué remotes semeyances.
Caer d’agotamientu na ventana
y esperar la muerte.
Pequeña mosca.
Yá los sos güelpes
van perdiendo fuercia.
Tamién ella prisionera
d ́un mundu inesplicable.
POZU ENTREGO
Vei equí ́l castillete del Pozu Entrego.
Nunca asemeyó más brava la so figura.
Nunca más noble.
Paez ayenu al mundu, coronáu pol sol del mediudía.
Un altivu monumentu
a la memoria industrial.
Relluma
llimpiu de ferruñu y de povisa.
Puru.
Venimos a veneralu.
Y él,
apigaza indolente.
Completu. En paz.
Ensin embargu
nun mos engaña la so indiferencia.
Conocémoslu bien.
Un día y otru
yera dueñu de les vides.
Afuracó’l suelu
y les sos venes infestaron el valle.
Pantasmes terribles.
Conocía tolos nomes de la muerte: Grisú, Derrabe, Costeru.
El so turuyu
marcó tiránicu ́l tiempu y el sen de les coses.
Implacable.
Segó los tallos
de tantos y tantos de los nuestros.
Venimos a veneralu
Dende la so altura
fai por mirar con güeyos de ferre
pero yá nun pué.
Dios cruel.
Apagósete la fame.
Del to reinu esto ye lo que queda:
Un castillete ensin mina
Una vía ensin trenes.